Ministri i Shëndetësisë, z. Ilir Beqaj, mori pjesë sot në ceremoninë e organizuar në Spitalin Rajonal të Vlorës, me rastin e hapjes së qendres rajonale të Telemjekësisë për Vlorën, në bashkëpunim me projektin e USAID-it.
Duke falënderuar për mbështetjen që USAID-i dhe Amerika kanë dhënë përgjithësisht për përmirësimin e kujdesit shëndetësor në Shqipëri, z. Beqaj u shpreh se përveç inovacionit dhe progresit, ndërhyrje të tilla, përbëjnë edhe një vlerë të shtuar për sigurinë, qoftë të pacientëve, apo qoftë mjekëve të Vlorës.
"Përveç mjekëve shumë të mirë dhe personelit të të këtij shërbimi spitalor, - tha më tej ai, përveç kushteve të mira që po vijnë përherë e më tepër duke u përmirësuar, por edhe sigurisë që ka një furnizim më ritmik me barna, apo ka një grup pajisjesh biomjekësore të disponueshme, në rast nevoje, ka një konsultim shumë më të shpejtë me një mjek edhe më të kualifikuar në shërbimet universitare." u shpreh ministri.